விடுதலைப்புலிகளின் மலேசிய பொறுப்பாளரான‌ “மலேசியா ராஜன்” கடந்த டிசம்பர் இறுதி நாட்களில் மலேசிய விமான நிலையத்தில் வைத்து முதலில் கைதுசெய்யப்பட்டார். தனது குடும்பம் சகிதமாக பிலிப்பைன்ஸ்சில் தலைமறைவாக இருந்துவிட்டு மலேசிய திரும்புகையில் மலேசிய புலனாய்வுப்பிரிவினரிடம் கைதானார்.கேபியின் கைதை தொடர்ந்து மலேசியாவை விட்டு தப்பியோடிய ராஜன் நீண்ட காலமாக மலேசிய புலனாய்வுப்பிரிவின் வலைவிரிப்பில் இருந்தவர் என்பதும் குறிப்பிடத்தக்கது.

விடுதலைப்புலிகளின் உறுப்பினரான மலேசியா ராஜன் என்றழைக்கப்படும் சுப்பிரமணியம் சிவகுமார் (வயது 42)அவரது குடும்பத்தினருடன் கைது செய்யப்பட்டுள்ளார். அவரது மனைவியையும் பிள்ளைகளையும் விடுதலை செய்து விமானநிலையத்துக்கு வெளியே செல்ல அனுமதித்த மலேசிய‌ நாட்டு குடிவரவு மற்றும் புலனாய்வு பிரிவினர் ராஜனை விசாரணைக்காக அழைத்து சென்றனர்.

கடந்த ஒருமாதகாலமாக மலேசியாவில் விசாரணைக்குட்படுத்திய மலேசிய புலனாய்வுப்பிரிவினர் ராஜனுடன் இணைந்து செயற்படும் மலேசிய குடியுரிமை கொண்ட சிலரையும் கைதுசெய்துள்ளதாக மறுஆய்வுக்கு தெரியவருகிறது. மலேசியாவை மையங்கொண்டு செயற்படும் புலிகளை கட்டுப்படுத்தும் மலேசிய புலனாய்வுப்பிரிவினருக்கு சிறிலங்காவின் நாடுகடந்த புலனாய்வுத்துறையும் கூட்டாக சேர்ந்து இந்த நடவடிக்கையில் கடந்த பல மாதங்களாக ஈடுப்பட்டிருப்பதும் தெரியவந்துள்ளது. இந்த நடவடிக்கையின் நிமித்தம் அனைத்துலக செயற்பாட்டில் இருந்த வன்னியில் இராணுவத்திடம் சரணடைந்த புலிகளும் மலேசியாவுக்கு அழைத்துவரப்பட்டுள்ளதாக நம்பகமான கொழும்பு தகவல்கள் தெரிவிக்கின்றன.

இதேவேளை மலேசியாவில் தனது விசாரணையை முடித்துக்கொண்ட மலேசிய புலனாய்வுப்பிரிவு நேற்று வியாழக்கிழமை உத்தியோகபூர்வமாக சிறிலங்கா பயங்கரவாத தடுப்பு பிரிவினரிடம் ராஜனை ஒப்படைத்துள்ளதாக கொழும்பு தகவல்கள் உறுதிப்படுத்துகின்றன.

ஆனால், நேற்று காலை கொழும்பில் வைத்து அவரை கைது செய்ததாக அறிவித்துள்ள சிறிலங்கா பயங்கரவாத தடுப்பு பிரிவின் பணிப்பாளர், மலேசியா ராஜனை தாம் பல ஆண்டுகளாக தேடிவந்ததாகவும் -

அவர் கண்ணன் என்ற பெயரிலும் செல்லத்துரை சாந்தகுமார் என்ற பெயரிலும் பல பயங்கரவாத நடவடிக்கைகளில் ஈடுபட்டுவந்தார் என்றும் 1996 ஆம் ஆண்டு கொட்டாஞ்சேனை சாம விகாரைக்கு அருகாமையில் வெடிமருந்துகள் அடங்கிய லேடன் வாகனம் ஒன்று கைப்பற்றப்பட்ட சம்பவம் முதல் உள்நாட்டு வெளிநாட்டு புலனாய்வு பிரிவினரால் தேடப்பட்டுவந்தவர் என்றும் தெரிவித்துள்ளார்..

விடுதலைப்புலிகளின் தலைவர் பிரபாகரனுக்கு மிகவும் நெருக்கமான இவர் அந்த அமைப்பினருக்கு ஆயுத வழங்கல்களை மேற்கொள்ளுதல், விடுதலைப்புலிகளின் புலனாய்வுபிரிவினரை கொழும்புக்கு கூட்டிவருதல் போன்ற செயற்பாடுகளை மிகவும் வெற்றிகரமாக மேற்கொண்டுவந்தார் என்றும் அவர் கூறினார்.

சிறிலங்கா அரசின் தடுப்புக்காவலிலுள்ள கே.பி. மீது மேற்கொள்ளப்பட்ட விசாரணைகளின்படி இவர் கைது செய்யப்பட்டாரா என்ற கேட்கப்பட்ட கேள்விக்கு பதிலளிக்க மறுத்த சிறிலங்கா பயங்கரவாத தடுப்பு பிரிவின் அதிகாரி, தற்போது நடைபெற்றுவரும் விசாரணைகளுக்க பங்கம் விளைவிக்கக்கூடி பதில்களை தாம் வெளியிடவிரும்பவில்லை என்றார்.

மே18 க்கு பின்னர் அனைத்துலக கஸ்ரோவின் இளவரசர்களின் தொடர்பில் இருந்து வந்த ராஜனின் கைது கடந்த டிசம்பர் இறுதி நாட்களில் நிகழ்ந்தது.எனினும் அது பற்றிய எந்த கரிசனையின்றி மௌனம் காத்து வந்த கஸ்ரோவின் இளவரசர்கள் இந்த கைதின் பின்னணியில் இருப்பதாகவும் பிறிதொரு தகவல் தெரிவிக்கின்றது.


மறு ஆய்வு

2005 இடம்பெற்ற ஜனாதிபதித் தேர்லில் தமிழ் மக்கள் வாக்களிப்பதை தடுப்பதற்காக புலிகளுக்கு பசில் ராஜபக்சவினால் என் கண்முன்னே பணம் வழங்கப்பட்டது என சிறிலங்கா சுதந்திரக் கட்சி (மக்கள் பிரிவு) யின் செயலாளர் ரிரான் அலெக்ஸ்தெரிவித்துள்ளார். 

ரிரான் அலெக்ஸ் தனது வீட்டிற்கு நேற்று ஊடகவியலாளர்களை அழைத்து இது தொடர்பாக கூறுகையில், மங்கள சமரவீர அவர்கள் துறைமுகங்கள் மற்றும் விமான போக்குவரத்து அமைச்சராக இருந்த 2004ம் ஆண்டு காலகட்டத்தில் நான் விமான நிலையங்களுக்கான தலைவராக நியமிக்கப்பட்டிருந்தேன். அப்போது 2005ம் ஆண்டிற்கான ஜனாதிபதித் தேர்தல் நெருங்கிக் கொண்டிருந்தது. அக்காலகட்டத்தில் நாட்டின் பிரதம மந்திரியாக மஹிந்த ராஜபக்ச இருந்தார். என்னை மஹிந்த ராஜபக்ச அலறி மாளிகைக்கு அழைத்து, தனக்கு புலிளுடன் பேச்சுவார்த்தை நடாத்தவேண்டிய தேவை உள்ளதாகவும், அந்தப்பக்கத்தில் யாராவது தெரிந்தவர்கள் இருந்தால் அறிமுகம் செய்யுமாறும் கூறினார்.

எமில் காந்தன் என்பவருக்கு பெரியதோர் சரித்திரம் உண்டு அதைப்பற்றி நான் இப்போது பேச விரும்பவில்லை. 2002 ம் ஆண்டு டாக்டர் ஜெயலத் ஜெயவர்த்தன புனரமைப்பு அமைச்சராக இருந்தபோது, எமில் காந்தன் அவ்வமைச்சில் வேலை செய்துகொண்டிருந்தார். அத்தருணத்தில் அவர் எனக்கு அறிமுகமாயிருந்தார். மஹிந்தவின் வேண்டுதலை ஏற்று, எமில் காந்தன் கொழும்பில் உள்ள ஓர் வர்த்தகர், அவருக்கு புலிகளுடன் தொடர்பு உண்டு எனவும் வேண்டுமானால் அவரை அறிமுகம் செய்ய முடியும் எனவும் கூறினேன். அப்போது பசில் ராஜபக்சவை அறிமுகமா என வினவினார் இல்லை என்றேன். பசிலை அறிமுகம் செய்து வைத்த மஹிந்த ராஜபக்ச, எமில் காந்தனை அவருடன் தொடர்பு படுத்துமாறும் கூறினார். அப்போதுதான் பசில் ராஜபக்சவை நேரடியாக சந்தித்தேன். அதன் பின்னர் எமில் காந்தனை பசில் ராஜபக்சவிற்கு அறிமுகம் செய்து வைத்தேன். 

பசில் ராஜபக்சவும் எமில் காந்தனும் பேச்சுவார்த்தைகளை ஆரம்பித்தனர். அப்போது ஜனாதிபதி தேர்தல் நெருங்கியிருந்தது. ஜனாதிபதி தேர்தலில் மஹிந்த வெற்றிபெறும் பொருட்டு வடகிழக்கு மக்கள் தேர்தலை பகிஸ்கரிக்கவேண்டும் இதற்கான உதவியை புலிகளிடமிருந்து பெற்றுத்தாருங்கள், பிரதியுபகாரமாக எதை வேண்டுமானலும் செய்வோம் என பசில் ராஜபக்ச ஒருநாள் கூறியபோது, தமக்கு படகுகள் வாங்குவதற்கு பணம் வேண்டும் 180 மில்லியன்கள் (18 கோடி) தேவை எனக் கூறினார் எமில் காந்தன், பிரச்சினை இல்லை அப்பணத்தை தரமுடியுமென எவ்வித தயக்கமுமில்லாமல் கூறினார் பசில் ராஜபக்ச.

பிறிதொருநாள் எமில் காந்தனை சந்திக்க பசில் ராஜபக்ச வந்தார். நான் கனவில் கூட எதிர்பார்த்திராத சம்பவம் நிகழ்ந்தது. பசில் ராஜபக்ச பெரிய பயணப்பொதிகளுடன் வந்தார். பணம் பரிமாறப்பட்டது. வட மாகாண மக்களை வாக்களிக்காமல் தடுப்பதற்கு புலிகளுக்கு வழங்கப்பட்ட கப்பம் அது. 

2007ம் ஆண்டு என்னை குற்றப்புலனாய்வுப் பிரிவினர் கைது செய்து செய்து தடுத்து வைத்திருந்தபோது இவ்விடயத்தை அவர்களுக்கும் கூறினேன். அவர்கள் அதிர்ச்சியடைந்தார்கள் இவ்விடயத்தை எனது வாக்குமூலத்தில் பதிய மறுத்தனர். அவ்வாறு இவ்விடயத்தை எனது வாக்குமூலத்தில் பதியாவிட்டால் நான் எந்தவோர் வாக்குமூலத்திலும் கையொப்பம் இடமாட்டேன் என கூறினேன். பின்னர் என்மீது எவ்வித வழக்குகளும் தாக்கல் செய்யாமல் சகல குற்றச்சாட்டுகளிலிருந்தும் விடுவித்தார்கள். 

18 கோடி ரூபா பணத்திற்காக தமிழ் மக்களின் ஜனநாயக உரிமையை மறுத்த பிரபாகரனுக்கு கோடாரியால் கொத்துவிழுந்தது சரியோ தவறோ என்பதை தீர்மானிப்பதற்கு இவ்விடயம் போதுமானது என மக்கள் பேசுகின்றனர். எதுவாக இருந்தாலும் இவ்விடயம் இன்று இலங்கையில் உள்ள பிரபல ஊடகங்கள் யாவற்றிலும் வெளிவந்துள்ளபோதும், தமிழ் ஊடகங்கள் எதுவும் இவ்விடயத்தை கண்டுகொள்ளவில்லை என்பது கேலிக்குரியது. இன்னும் சில நாட்களில் அது தமிழ் மக்களின் காதுகளில் விழும்போது எமில் காந்தன் இவ்விடயத்தை பயன்படுத்தி பசிலிடம் பணம் வாங்கிய விடயம் பிரபாகரனுக்கு தெரியாது என்று கதைவிடவும் தயங்கமாட்டார்கள் என நம்பப்படுகின்றது.